'' نجوم الليل ''
خلّ الهوا لا ذعذع الصبح يطرقك
لا تِدّرق لا صرت بالحيل ضايق
يمكن ليا قامت هبوبه تسارقك
تِسجّ عن صكّات بقعا دقايق
والله لو سجن المباحث مطوّقك
عرفت سجّات القدم بالحدايق
سجّه لعلّ هموم قلبك تفارقك
ماحدن بهالدنيا من الناس فايق
ولا تتبع الهاجوس بكره يوهّقك
الهم والهاجوس مثل الخلايق
إليا تمكّن منك كسّر مطارقك
وادعى صناديق الضماير شلايق
خلّ العباد ووكّل أمرك لخالقك
ولا تامن الشيطان وأم البوايق
الذنب مثل الداب بالسم يشرقك
ومانتب إليا ما تبت للذنب طايق
وكانك تحب الطيب والطيب مَعْشَقك
فاصبر على حِسْد البشر والمضايق
وكان الشرف والعز دربه يشوّقك
جاهد قبل تِنصب عليك الطبايق
سِجّ القدم ما دام مالله معوّقك
في ساحتن للعزّ فيها وثايق
عانق نجوم الليل حتى تعانقك
وخلّك مع اللي ينطحون العوايق
سابق رجالن للمعالي تسابقك
وابعد عن اللي يشعلون الحرايق
فِان كان رب البيت للخير سايقك
بتشوف بالدنيا العجب والحقايق
احدن ليا منّه تضايق يضايقك
واحدن ليا ضاقت عليك يتضايق
واحدن على الذلّه يجرّك ويرهقك
واحدن على العزّه يسوقك بسايق
اِسمع كلام اللي يحبّك ويصدقك
والحق بيّن والمراجل طرايق
ممدوح بن عبدالله المرزوقي
شاعر الثقلين
سجن الطرفية - ٢٩ / ٧ / ١٤٣٨ هـ
