كــلّن يــعايد بــاول الــعيد غــاليه
وعيدي من الفرقا الدموع الثمينه
احــدن يــعايد بــين ربعه واهاليه
واحدن يعايد بالسجون الحصينه
عــيدن عــسى ربي يزيّن مساعيه
لــو انــها فــي داخل السجن شينه
عــيدن بــدون الــوالده مــالنا فيه
لــو زانــت ايــامه فــلاهيب زيــنه
الــعيد والله شــوفة امي وطاريه
وتــقــبـيلـة ايـديـها بــذلّن ولِــينه
يــا مــن يــعايد لي عليها واجازيه
فـــي دعــوتن لــله بــيني وبــينه
يــقول يــالقلب الــرحوم ومحانيه
يــا مــهجة الــممدوح يا نور عينه
عــيدن عــليك يعود باحلى لياليه
وعيدن عليك يعود بامْن وسكينه
يــا عــيد قلبي ونوره اللي مقدّيه
يــا لــهفة اشــواقه وزفــرة حنينه
يا منبع العطف الصدوق ومجاريه
يــا ذا الــحنان اللي يتدفّق بحينه
يــا جــنّتي وبــستان قلبي وواليه
يــا ريحة الفردوس الاعلى وطِينه
يــا عِــزّي الــسامي وهيبة معاليه
يــا روح روحي والخفوق وضنينه
يــا مكسبي يا راس مالي وصافيه
يــا غــيث قــلبي يا عطاه وعوينه
يــامْ الــجَنَان اللي تزاحم حسانيه
يـــا قــمّة الــحب الــمخلّد بــعينه
يــا قــرّة فــوادي وغــاية مــرابيه
الــعبد مــكتوب الــقدر في جبينه
الــعذر يــا ســلطان قلبي وحاميه
مــمدوح مــا غــير الحديد بيدينه
بــين الشبوك اعايد الدمع واخفيه
يــا عــيد عــيد الــغلغله والضغينه
الــعيد عــندي ســامياتن مــعانيه
لــكنها بــالسجن ضــيم وضــغينه
الــعيد لــو هــو عــيد مالله محلّيه
الــيا ابــعد الــمخلوق عن والدينه
والله يــا لولا واحدن فوق نرجيه
مــاصبر على فرقا الحنون الرزينه
يــوم اذكــر امي نور داري وراعيه
ابــكي وانــا كــبدي من الله متينه
قــلبي ثــلاث سنين والبعد طاويه
مــا شــفتها والــعيد ويــني ووينه
عــيدن يــزوّد هــم قــلبي ويدميه
يــصبح ويــمسي عبرته في وتينه
يــا عــيد قلبي نار الاشواق تكويه
وانــته تــنقّض بــالجروح الدفينه
نقضت جرحن بين الاضلاع كاميه
وابــكيت عينن من جداها حزينه
ذكّــرتني يــا عــيد ما كنت ناسيه
وخــلّيتني لــجروح قــلبي رهينه
جرحن جرحته واجب انك تداويه
لا يــصـبـح الموت المصفّى خدينه
يــوم آتــذكّر طول عمري وماضيه
خــطرن عــلى قــلبي يبيّح كنينه
يــتــوق قــلــبي لا تــذكّر مــغانيه
فــالــبر والّا فــي ربــوع الــمدينه
عــمرن مضى بين الرجال المداليه
الله يــعوّض مــا غــدا مــن سنينه
ويالله يــاللي دبــرة الــخلق بيديه
تــرفع لــنا بــامرك شــراع السفينه
ممدوح بن عبدالله المرزوقي
"شاعر الثقلين"
