'' هب النسيم ''
هب النسيم وجاب ريحة مواطنك
ولجّ الفواد من الروايح وعوّى
إفتح لنا البيبان يا خازن البنك
نبغى من عطور الجَنَان نتهوّى
ترى الوفا والطيب من طيب معدنك
لو مابه الا قولتك ويش سوّى
لِدّ بشبابك والتفت في مفاتنك
وانته تَعَرف اللي بحالي مسوّى
طيفك يداعبني وعيني تعاينك
تضحك وصوتك داخل القلب دوّى
ما والله أنسى يوم أجيلك واعاونك
وارسم أنا واياك فوق المقوّى
توّك صغير وجلّ منهو مكوّنك
سبحان ربّن كمّلك يوم سوّى
حسبي عليك أهويتني في مكامنك
وكم واحدن من سبّة الحب هوّى
بشكي عليك من الغلا واشتكي منك
لو أدري اني من غلاك آتكوّى
بعض التغلّي يحرق القلب يا عنك
ماقدر عليه ولا عليه آتقوّى
إليا نويت أقلب كيانك واجنّنك
واجرّ قلبك بالطريق الملوّى
أذكر سواليفك معي وآتمعّنك
واضحك واقول اللي يحبك مغوّى
وشلون تبغاني على قلبي آمنك
وانته تسوي شيّ ما ينتسوّى
والله لو سبّبت لي بالهوى ضنك
ماني من اللي يلتوي ويتطوّى
تطيح من عيني وقلبي يتحضّنك
طيحة غلا منها الفواد يتلوّى
واعتب عليك ويخجلنّي محاسنك
واخفيك في قلبي عن الناس جوّى
أخاف يومن فيه ما عاد أعيّنك
لجله أوسّع خاطري وآتروّى
خلّ التغلّي يا بعد خافقي عنك
ترى البشر كله من آدم وحوّى
ممدوح بن عبدالله المرزوقي
شاعر الثقلين
سجن الطرفية - 1438/4/17هـ
