" العشره "
النفس تشره وشرهتها على الغالي
وباق المخاليق مالي في معاتبها
وما أشرّه الا بعد صدّه وغربالي
والمقفي النفس خلفه ما نتعّبها
اللهُ أكبر رغبتوا يا بعد حالي
ووش رغّب إنفوسكم عنّا وطيّبها
كنّا نتقاسم مذاق المر و الحالي
وظنوننا في بعضنا ما نخيّبها
والحال لعيونكم لحّقته المالي
وروحي على شان راحتكم معذّبها
ما ينقص الطيب في مدّي ومكيالي
لو الليالي تعرضّني مخالبها
من خلقتي ماانزل إلا المنزل العالي
وباق المنازل ولو زانت نجنّبها
وهبّت علينا هبوبن مالها تالي
عواصفن تقلب الروس بهبايبها
الله يجازيك يا غبّات الاهوالي
مدري على الله متى تصفي مشاربها
السجن طوّل علينا وعهدنا طالي
وساعة فراق الأهل دقّت عقاربها
نفوس الأحباب طابت والله الوالي
عقب الغلا ما تبي شوفة معزّبها
وان رَخْصت العشره اللي سوقها غالي
الله يعوض الحبايب في حبايبها
يوم العيال أصبحوا شبّان ورجالي
نسيتوا الحق والعشره وصاحبها
حسبي على اللي قلبكم و اخلف أحوالي
عسى حياته وليّ العرش يقلبها
مانيب الاول من الأمه ولا التالي
كم خيّرن صكّته بقعا بمخلبها
ويالله يا واحدن فوق السما عالي
يا فاطرن مشرق الدنيا ومغربها
تفرج لعبدن طواه السجن يا والي
إثنا عشر عام والراحه محاربها
واضحك من الهم كنه منشرح بالي
وطعون الأيام في كبدي مضاربها
ياما تصبّرت بالاقفا والاقبالي
لين المقادير ربّتني تجاربها
جرّبت الأصحاب في حلّي وترحالي
ومجرّب الناس والدنيا مجرّبها
ولولا قيودي تلقّيت الخلا الخالي
حرّن ونفسي لرب البيت جالبها
ممدوح المرزوقي - سجن الطرفية - 1436/12/27هـ
اللهم ربنا برحمتك ولطفك عوضه عوضا يليق بكرمك
ردحذف